قام فايز السراج الأسبوع الماضي بزيارة إلى بلديات الجميل ، رقدالين ، زلطن

قام فايز السراج الأسبوع الماضي بزيارة إلى بلديات الجميل ، رقدالين ، زلطن .

إلى هنا هذا الخبر عادي ولاكن أسمعو ماحدث في الكواليس والتكوليس .

أمس في الهدرزة في حالة وفاة مع الجماعة ناض قريبي وكان واحد من الحاضرين وقت إستقبال السراج عند هبوط الطائرة المروحية في مستشفى الجميل وقال.

تعرفو لما نزلت الهليكوبتر في ساحة المستشفى جاية من طرابلس والناس واقفين يستنو المسؤلين وأعيان المنطقة وشيوخ القبائل وأفراد الأمن لن لونيتها جاية تلوي من بعيد ولما بتنزل شد روحك التراب عجاجة ماعاد حد يشوف في حد وتشوف غير الطواقي البيض والكبابيس تطاير واللي شاد ملف في إيده معاش لقاه وكرتونيات تطاير وشيش تتكركب وشيابين يتكركبو في إلى عثر في جرده واللي قرواطته تشلبخ فيه واللي طلع يجري بيلبد وراء سيارة الإسعاف وإلا المطافي طاح وتشرك سرواله المهم حالة صارت.

قاله واحد ماهو المفروض نظفوه البيركيدجو وإلا داروله تبخبيخة حتى بسيارة المطافي قاله سيارة المطافي جابوها منظر بس لأنها ماتخدمش وأصلا اللجنة القائمة على الإستقبال متعمدين يخلوها الدنيا على طبيعتها لأن واحد إقترح عليهم وقاللهم أسمعو
الميزانية الممنوحة بالخصوص نصرفوها على صيانة الطرق فقط لأن بنستفيدو منها وبنصكرو الحفر والتكسيرات اللي في الكياس والباقي خلوه باش يشوفه وهو خاش بالرتل متاعه ويسخف علينا ويصرفلنا ميزانية باهية للبلدية وقاللهم.

زمان أيامات معمر يجي ونديرو قبله في صيانة وتزويق وحملة تشجير يقول المنطقة نظيفة وباهية وماناقصهم شي هذا علاش قعدنا هكي ما إستفدناش من الدولة.

المهم الناس إقتنعت بكلامه ودارو صيانة للطريق بس ومجهزين ملفات بيقدموهاله بخصوص هلبة مواضيع كلها طارت وتمزقت وماعرفش يوصل فيه إلا مجموعة معينة اللي الفكرة في رؤوسهم وحافظينها ناضله واحد من المقعمزين معانا وقاله أنت وصلت فيه وهدزت عليه السراج.

قاله أنا روحت لأني كنت واقف من قدام في أول الناس ولما صارت العجاجة على قد ماقاومت وغطيت رأسي بالدجاكة واحد من الجماعة نفخاته الريح وجاني يتكركب خبطني وكركبني معاه لن سروالي تمزق من تالي من الشق للق وغطيته بالشنطة متاعي لن وصلت لسيارتي وطول للحوش معاش طلعت خسارة سروال البدلة وجعني شاريها بشيك مصدق جديدة أول لبسة تشرك حتى من جيهة الركاب وقام سرواله للركبة ورانا الخرطة اللي حصلها والدم في ركبته.

وأنا طول طلعت مني كلمة تستاهلو
شافلي على جنب شبحة متاع واحد عنده صداع ومغص ومتكنطي وبيبكي وقاللي تتشمت فيا حرام عليك.
قتله وأنا نضحك أنا قلت تستاهلو بالجمع وماقلتش تستاهل إن شاء الله لاباس عليك.
علاش اللي ايدبر عليكم تصدقوه والعادات والتقاليد متاع إستقبال الرؤساء ماشيين عليها كل العرب في كل مكان وزمان توة أنتم بتطلعو فالحين.
قاللي تعرف صاحب الفكرة والدبارة لقوه مقعمز في لبوة مفخرة ونزل بعد ماطفت الهليكوبتر ووقف في الطابور وهو زي الراجل الطيب ومتجنتل وسلم عليه السراج بإيديه الزوز ورافقه طول الوقت
قتله صحة ليه يعجبني طلع حادق وقتله أسكت بالله عليك بتفضحنا حنا في حالة وفاة وأنا مانقدرش نشد روحي عالضحك هههههههههه

محمد علي

الحركة الوطنية الشعبية الليبية
Advertisements